Gezamenlik mediaberich Roersjtreekvereniginge
2020
Opening van vasteloavend ’20/’21
2020
Leef vastelaovesvierders in Vlorp,
Ós laeve wirt nag sjteeds beïnvloed door ’t Coronavirus en alle regels dao om haer. ’t Kin dan ouch neet oetblieve det dit gevolge haet veur ’t vastelaovessezoen 2020 – 2021. Vastelaovend is ’n fees van gezelligheid, saamheurigheid, sjpas en plezeer. Veer pakke os vas, zinge en sjoenkele same. Zelfs mit in ach numming van alle regelgaeving rondom Corona en alle te treffe maotregele, waobie de gezondheid veur jidderein oppe eerste plaats sjteit, is ’t onmeugelik om ’n fees wie vastelaovend in gooj orde en zonger risico’s te laote verloupe. Mit de actuele situatie veur uig en de zorg veur de gezondheidsrisico’s vanne luuj hebbe veer in alle wiesheid, maar mit pien in os vastelaoveshert besjlaote, det alle aktiviteite veur ’n jaor waere opgesjort. Veer zeen toet dees gezamelikke besjlissing gekomme nao euverlegk mit os eige Raod van Ellef, De Senatore, J.C.V. de Eerstelinge, Sjtichting Boerebroelig en joekskapel Sjoon Kloote. Dus gein nuuje veurgengers kommend jaor. Geine bonte aovend, gein prinsebal en resepsies, gein boerebroelig en ouch geine optoch op vastelaovesmaondig. Veer zalle op ’n later moment, es dit binne alle regelgaeving meugeligk is, waal op gepaste meneer aafsjied numme van Prins Ramon I en zien adjudante en wo meugelik zalle veer os laote zeen en van os laote heure. Wie de kommende vastelaovend oet geit zeen weite veer allemaol neet. Vastelaovend is effe alle zörg aanne kant zette en onbevange de gezelligheid opzeuke, same met jonk en awt, groot en klein, viere, lache, danse en ’n pilske drinke. Zolang ’t virus rondwaart en d’r gein vaccin is wirt dit helaas beperk en is ’t lestig om ’n sjpontaan fees te viere wat rech duit aanne Vlorper vastelaovend. Veer blieve zeker kieke nao wat waal kin en moog omdet veer de vastelaovend in Vlorp laevend wille hawte! Hawt de versjillende social media en de websites good in de gate veur updates en nuujts. Ouch zalle veer ug geregeld informere middels ozze nuujtsbreef.’t Veult vraemp om zo’n besjloet te motte numme, maar de gezondheid van alle vastelaovesvierders in Vlorp waeg zjwaorder dan ’t neet door laote gaon van ein sjoon tradisie.
Blief gezond en Alaaf!
C.V. de Beerbök, J.C.V. de Eerstelinge, Sjtichting Boerebroelig, Joekskapel Sjoon Kloote
