Proklamasie Prins Marco I

Op ’t Prinsematinee gehawte op zondig 19 november, weer truuk inne Blokhut achter de kirk in Vlorp, in ’t 60 ste laevesjaor van os blaw-gael vereniging, waerde door Vors Roel, mit goodvinge van de onwieze Raod van Ellef, os charmante Tanzmarieches Julie & Sjuul, es ouch onger ’t alzeende oug van os Senatore, toet Prins Carnaval euver ‘t Vlorper Beerbokkeriek oetgerope en geproklameerd:

PRINS MARCO I

Marco is gebaore op 21 april 1973 in ’t riek vanne Puinesjödders in Ittervoort, es awste en inzigste zoon van de Witte van Roos oet Mestreech en Ineke van Sefke van Hulsberg. Waal haet Marco nag ein jonger zuster Monique. In ’t dagelijks laeve woont Marco same mit zien vrouw Miriam (Mir) oppe Bongerdsjtraot 9a in Vlorp. Zie wone dao same mit heure zoon en tevens adjudant Ruben.

Marco haet op basissjool “De Schakel” gezaete in Ittervoort. Of d’r dao al geliek gesjakelt haet det d’r later baeter nao Vlorp kosj verhoeze is neet bekind. Nao de Mavo “Sint Ansfried” in Thoor, ’t Cios in Sittard en de ALO in Tilburg haet Marco nog ein Masterstudie Sjport en Bewaegingeducatie in Eindhoven gedaon. Hiemit is Marco waarsjienlijk geliek de sjlumste maar zeker ouch de sjportiefste binne os club. Wie Marco jongk waar is hae begonne mit wirke bie de boer. Dit waar hem neet sjportief genog en al gauw verruulde hae ’t plattelanjd veur de fiets en ging hae aan de sjlaag bie de PTT Pos als posbode. Ouch haet hae gesjoefelt in de greunveurziening en gewirk in de gehandicaptezorg. Momenteel is hae gymdocent op ’t Grescollege in Reuver. Hae kin auch door veur docent Nederlands, aangezeen hae alles wit van lijdende en mitwerkende ongerwerpe, omdet hae bie de examestunts zien meist gewaagde dansmoves mot laote zeen.

Omdet hae op ‘t werk veural angere leet sporte, haet hae in ziene vrieje tied nog genog energie euver veur zien eige hobbies. Zo duit Marco al sinds zien 6e jaor aan Kime-No-Kata, ein vorm van Judo. Det kumt noe mit de vasteloavend goot oet, want nao al det beer haet hae dan No Kata (kater…). Of laef hae volges de awwe Japanse wiesheid: Na Bier veel Wata, no Kata!  Ouch moog hae zich inmiddels toet ein zeer select gruupke Judoka’s tille det de 6e Dan haet behaold. Noe maar haope det hae deze vastelaovend neet oet de band springt, dan is hae ze alle 6 weer kwiet. Ouch waar Marco in 2013 Nederlands Kampioen Kime-No-Kata. Marco is zelfs zo gek op die sjport det hae in 2015 ein eige book euver haet gesjreve namelik Kodokan Kime-No-Kata. Dus mog geer hem mit de vastelaovend mit eine kladblok zeen loupe dan wit geer det d’r kommend jaor ein book euver C.V. de Beerbök in de winkel lik mit de leukste anekdotes van ’t kommend sezoen.

Ouch beheurd Marco toet ’t clubke “Iesbaere”. Det zeen eigelik sjaatsers zonger sjaatse, die neet wachte toet al ’t water is bevraore. Verder duit Marco nog trailrunne en drink hae zich gaer op zaoterdigmiddig ein speciaal beerke mit ziene buurman John. Det zeen allebei hobbies die hem dit sezoen goot van pas komme bie het loupe van polonaises in zale mit väöl kinger en confetti. Verder kint geer Marco missjien van Sjutterie Sint Martinus. Hie is hae zowaal vaandeldrager gewaes es ouch Sjötterskeuning in 2011!

Marco is ouch gek op de vastelaovend. Zo duit Marco al jaore mit in de Grote Vlorper Optoch. Meistal als kleine groep same mit Mirjam en Arjanne. In de Vlorper Optoch is Marco al dukker prins gewaes van C.V. de Beerbök. Aafgeloupe jaor haet hae nog es prins mitgeloupe, dus dao haet hae zien generale repetisie al gehad zonger det geer ’t wis. Hae haet in de Vlorper Optoch al väöl eerste prieze behaold en zelfs de Tönke troffee gewonne. Maar d’r zit nag meer vastelaovend in de femelie, want zoon Ruben is zowaal vors als prins gewaes bie J.C.V. de Eerstelinge.

Moog ’t hem gegaeve zeen, om os ‘t ganse vastelaovessezoen veur te gaon op de waeg van sjpas en plezeer, getroew aan zien prinselikke motto:

“Ippon, alaaf!”

Gegaeve in Vlorp op de 19^de november van ‘t jaor 2023.

Geteikend:

Awt-Prins Mark I                       Vors Roel
Raod van Ellef                           Besjtuur
Adjudant Ruben                       Adjudant Jay
Tanzmarieche Julie                 Tanzmarieche Sjuul