Prins Quinn I & prinses Dilana
2022
Vlorper Optoch 2023
2023
Op ’t Prinsematinee gehawte op zondig 13 november inne zaal bie Frits van Tönke, in ’t 59ste laevesjaor van os blaw-gael vereniging, waerde door Vors Roel, mit goodvinge van de onwieze Raod van Ellef, os charmante Tanzmarieches Lana en Nienke, es ouch onger ’t alzeende oug van os Senatore, toet Prins Carnaval euver ‘t Vlorper Beerbokkeriek oetgerope en geproklameerd:
PRINS MARK I
Mark is gebaore op 22 mei 1978 in Remung, es jongste zoon van Jan van bekker Jean en To van Huubkes Ies oet Weer en Marijke van Sjeng van de bekker en Mie van de Meule. Verder haet hae nag ein awwer broor Patrick. In ’t dagelijks laeve woont Mark same mit zien vriendin Nadine van Kempen oppe Randwaeg 12 in os sjoone dörpke Vlorp. Zie wone dao same mit heur dochter Jana en heure femiliehond Max.
Mark haet zowaal de kleursjool es de basissjool in Vlorp doorloupe. Nao de legere sjool en ein jaor op de Mavo in Remunj is hae veur zien opleiding nao ’t boeteland gegange en haet d’r bie Technisch instituut Sint Jansberg in Maaseik, de opleiding toet meubelmaker gevolg. Mark is geine luije prins, hae is al vanaaf zien 13e laevesjaor actief mit allerlei bie baantjes, zo haet der eine tied bone en courgette geplukt bie ziene Oome Thijs, hae haet bie Familie van de Beek in de stoffeerderie gewirkt. Tiedes en nao zien sjtudie wirkte Mark es machinaal houtbewirker en CNC programmeur bie versjillende meubelmakerieje. Maar Mark duid gaer vertille en is neet op ziene monjd gevalle, dit kos hae dan aog good gebroeke en hae is aan de sjlaag gegange es technisch adviseur euver de peul in Belsj. Hie haet die Belsje vanalles wies gemaakt euver sjlieptechnieke, dit haet um oeteindelijk gebrach toet zien huidige functie als Keyaccount manager en Product specialist bie de Wereldmarktleider in houtbewirkings gereidsjappe de Firma Leitz in Nederland.
Mark haet ouch eine houp hobbies. Zo wie de meiste luuj in Vlorp waal weite, en ’t CJIB ‘m dao waarsjienlijk dankbaar veur is, zeen motorrieje op de waeg en in de modder der twee van. Verder haet Mark ouch minder sjnelle hobbies wie campere mit de caravan, klusse of vrunj helpe mit klusse en oetruste in zien nuuje tuinhoes. Daonaeve maak Mark zich ouch sinds ein aantal jaor verdeenstelijk es besjtuurslid van de Boerebroelig in Vlorp.
Ouch sjporte haet Mark altied gaer gedaon. Zo is hae vanaaf zien 15e bie de here gymclub Bie driek in de sjporthal, maar door ein van zien sjnelle hobbies haet der ein knieblessure opgelaope en is Mark vanaaf zien 37e ut sjporte gaon doon in de heilige huuskes van Vlorp. Neet allein ein drenkske nuttige, maar ouch aete kint Mark good. ’t Leefste it Mark alles wat 180 grade is opgewermp. Wie Mark zellef zaet kint hae iddere frituur in Nedelandj en Belsj in eine sjtraol van 100km. Toch is dao door ’t veule wanjele mit (hond) Max nieks van te zeen.
Verder is Mark eine echte vastelaovesgek. Es klein kind dee Mark al mit in de Grote Vlorper Optoch. Daonao is Mark bie de Eerstelinge gegange wo men al sjnel door had det Mark neet op zien mundje gevalle woor. Al sjnel hebbe ze Mark de sjteek mit de 2 vaere gegaeve en moch hae zien sjpreakkunste es Vors tentoon sjpreide. Daonao is hae nog eine tied leider gewaes van jeugdwerk in Vlorp, saame mit Mark Tegels. De litste jaore is Mark lid van ziene vrunjegroep en teves vastelaovesgekke “De Zeiverläp”. Ouch is Mark vaste gast op ’t Alt-Weiber fees in Heinsberg op de donderdig veur de vastelaovend. Of Mark dao gekker is op die Alte Weiber of die Alte Weiber op Mark laote veer maar in ’t midde.
Moog ’t hem gegaeve zeen, om os ‘t ganse vastelaovessezoen veur te gaon op de waeg van sjpas en plezeer, getroew aan zien prinselikke motto:
“Same vierse meer!”
Gegaeve in Vlorp op de 13de november van ‘t jaor 2022.
Geteikend:
Awt-Prins Ramon I Vors Roel
Raod van Ellef Besjtuur
Adjudant Frank Adjudant Guido
Tanzmarieche Lana Tanzmarieche Nienke
