Proklamasie

Op ’t Prinsematinee gehawte op zondig 17 november, inne Blokhut achter de kirk in Vlorp, in ’t 61 ste laevesjaor van os blaw-gael vereniging, waerde door Vors Roel, mit goodvinge van de onwieze Raod van Ellef, os charmante Tanzmarieches Julie & Sjuul, es ouch onger ’t alzeende oug van os Senatore, toet 59^e Prins Carnaval euver ‘t Vlorper Beerbokkeriek oetgerope en geproklameerd:

PRINS ANDRÉ I

André is gebaore op 11 juni 1968 in ’t riek van de Godenzonen in Amsterdam, es awste en inzigste zoon van Andries Jacobus en Jenny Boer – Van Rooij. André haet nag ein jonger zus Annelies. In ’t dagelijks laeve woont André same mit zien vrouw Margit oppe Rothenbach in Vlorp. De meiste van os is dit bekind omdet ze vas en zeker eine keer zeen oetgeneudig veur ein feesje in de tuin, de riante kelder of ’t nog riantere tuinhoes wat André lits haet geboewt. Zie wone dao same mit heur dochter Fabienna. Adjudant Rico is inmiddels al weer ein paar jaor ’t hoes oet en woont noe in de aw pastorie in ’t sjoone Sjtaevesweert, same mit zien verloofde Angelina, Lisa en Noan..

André haet vreuger op de basissjool “Van Heuven Goedhart” gezaete. Wie d’r de basissjool probleemloos haet doorloupe is hae heel ijverig begonne aan ’t Atheneum van ‘t Snelliuslyceum in Amstelveen. Snellius zal gesjtange hebbe veur ’t werk- en denkniveau aangezeen André heel sjnel van ’t Atheneum truuk is gezak nao de Mavo. Dem haet d’r gelukkig waal aafgemaak. Nao zien sjtudie is André verhoes nao ’t Markoeveriek in Melick. Oppe Groenstraot bie Van Cann. Hoewel André ouch nag eine korte tied in Echt haet gewoond, vonj hae toch al gauw zien plaetske oppe Rothenbach.

Wie André ’t mooie Limburg haw ontdik is hae de MDS in Remunj gaon volge. Ijverig gesjtart, maar helaas neet aafgemaak. Dit kwaam neet door de kwaliteite van André, maar omdet hae emes taege kwaam dae vroog of André bidde op wou komme boewe. En nao alle krantewieke in Amstelveen te hebbe gehad en al de neudige detailhanjel ervaring op te hebbe gedaon bie Maxwell in Remunj en Capina, dach André det de biddebusiness eine rustige en probleemloze toekoms veur hem en zien gezin zou motte kinne zeen. Op 25 oktober 1993 haet André same mit Karel Koolen de zaak euvergenaome. Karel ging binne ein jaor ziene eige waeg en André is mit Margit in bid blieve ligge, ehhhh in de biddebusiness blieve zitte. Ouch dochter Fabienna help bie pap en mam mit in de zaak. Eers jaore detailhanjel, maar inmiddels is det meer groothanjel en productie gewaore. Vandao ouch de grote loods bie heur in de tuin.

Naeve werk is André eine echte sjportfanaat. Vreuger haet Andre veul gehockeyt, maar inmiddels hilt André zich binao idder weekend bezig mit Formule 1, kieke waal te versjtaon.  Vreuger haet hae waal veul geracet en hae hae zelfs bie de nachdcross ’t podium gehaold. Det vilt echter in ’t nieks bie de podiumplaats van vandaag. Anger hobby’s en interesse van André zeen treinen, vleegtuge en nae geine boot, maar visse. Ouch ’t ligge van fishes op de pokertaofel duit André gaer. Wie goot hae hie in is det ligk d’r ein bietje aan waem desse ’t vreugs. Echter is André geregeld nationaal en internationaal op ein toernooi te vinge. Wo André verder wild van is det is alles wat mit Oosteriek te make haet. Zowaal ’t lanjd, es de meziek, es de Dirndl’s en natuurlijk de grote pöt mit beer.

André is als Boer gebaore, maat later keuning gewaore. Sjötterskeuning om precies te zeen. Zowaal bie de sjötterie es ouch van ’t dörp. En nao ein jaor es Pokerprins bie C.V. “Veur eine keer” haet André 11 jaor geleje besjloate om bie de Raod van Ellef te komme. André haet ouch meerdere kere mitgeloupe mit ziene vrungegroep in de Grote Vlorper Optoch. Nao 11 jaor is hae vurrig jaor gesjtop es Raod van Ellef lid en vurrige waek benömp es Senator. D’r is get discussie gewaes of ‘t 10 of 11 sezoene ware die André bie de raod is gewaes. Maar veur de miense die twiefele aan de tilling kömp dao noe es kers op de taart nog ein geweldig sezoen bie.

Moog ’t hem gegaeve zeen, om os ‘t ganse vastelaovessezoen veur te gaon op de waeg van sjpas en plezeer, getroew aan zien prinselikke motto:

“SJLOET AAN, SAME GAON VEER DRAAN!”

Gegaeve in Vlorp op de 17^de november van ‘t jaor 2024.

Geteikend:

Awt-Prins Marco I                       Vors Roel
Raod van Ellef                             Besjtuur
Adjudant Roland                         Adjudant Marc
Adjudant Kenn                          Adjudant Rico
Tanzmarieche Julie                   Tanzmarieche Sjuul