Oppe Bonte Aovend van zoterdig 23 jannewarie in het 46e laevesjaor van os blaw-gael vereniging waerde door Vors Roel,

mit goodvinge van de onwieze Raod van ellef, os charmante Tanzmarieches Eva en Gwenny, es ouch onger 't alzeende oug

van os Senatore, toet 46e Prins Carnaval euver os Vlorper Beerbokke Riek oetgerope en geproklameerd:

Roland zoog 't laeveslich in 't Markoeveriek op 9 juni 1969 es awste en inzigste zoon van Jo van Wiel van Mien van 't Räötje

en Leny van Wiel van Lattene Baer. Hae is same mit zien zöstre Bianca grootgebrach oppe Parallelwaeg in Melick en haet hie

toet halverwaege de jaore '90 gewoond.

In 1996 kwaam hae tiedes 't altied drök bezochte Bal der einzame Herzen bie de Hoes in Mofert aanne kal, mit ein Vlorps

maedje, namelik Bianca Wilms, toen ein beerviltje aan zien glaas bleef plekke. Op det moment sjpronge de vonke euver en

vanaaf toen zeen zie biejein gebleve. Nao ein paar jäörkes zeen zie gaon samewone oppe Esdoornlaan in Vlorp, ein keus die

sjnel gemaak waas ! In desember van 't jaor 2000 zeen zie mitein getrouwd en intösje zeen zie de trotse elders van dochter

Kim en zoon Jordi.

Nao de legere sjool is Roland nao de Legere Detaijhandel Sjool in Remung gegange. Toen der die aaf haw haet der eers ein

paar maond gewirk en is toen 't leger ingegange. Dao haet hae zich ein van de biste bane oetgezoch, namelik: medewerker

in de Mess vanne onger-officiere, wo hae bardeenste dreijde en beurbereidinge mosj treffe veur 't aete. Dorsj en honger

haet d'r dus zeer zeker neet geleje !

Nao zien kariejère in 't leger haet hae eers ein tiedje bie ziene huidige baas gewirk en is toen veur ein periode van ongeveer

12 jaor aanne sjlaag gegange bie einzelfde bedrief, Sjmeets - Verhegge in Maasbrach. Maar wie ziene awwe baas alweer get

jaore truuk opnuuj emes zoch, bedach d'r zich neet lang en is hae same mit zien zjwaoger Mat weer aanne sjlaag gegange

bie Laters - Op de Kamp, die häör bedrief in Herte hebbe. Dao bewirk hae natuursjtein toet dörpels, vinsterbenk, keukeblaajer

en gank zo maar door.

Carnaval viere is hem neet vraemp want de femilie Janssen is in de Melicker vastelaovend zeker geine onbekinde naam. Väöl

van zien femilielede zeen lid af lid gewaes van KV de Markoef. Roland zellef waerde door zien pap en mam al op jonge laeftied

in 't vastelaovessjpeel betrokke. Zie bezochte mit enige regelmaot de carnavalsaktiviteite in häör dörp en deeje jaorliks mit de

ganse femilie aan de optoch mit.

De hobbies van Roland ligke hoofzakelik op 't sjportieve vlak; in zien jong jaore haet d'r altied aktief gevoetbald vie Vesta,

echter rond zien 30e mosj hae hie noodgedwonge mit sjtoppe aangezeen zien knäök 't neet langer toelete. Toen is hae

begosj mit darte bie DC de Prins en haet d'r zien voetbalkwaliteite in ein anger vorm bie de voetbalklub in Vlorp veurtgezat.

Ein paar jäörkes is hae leider ewaes van 't 2e elftal van Vlorp, maar dees funksie haet d'r veurig jaor verruuld veur de

funksie van trainer/begeleider vanne mini F-jes van VVV, wo ziene zoon Jordi op dit moment in voetbalt. Verder ongersjteunt

hae gaer zien ega bie de oetveuring van allerhande werkzaamhede veur onger meer 't Sinterklaoscomité.

Moog 't hem gegaeve zeen om os 't ganse sezoen veur te gaon oppe waeg van sjpas en plezeer, getroew aan zien

prinselikke motto: Graniet, marmer af sjtein, dees daag zeent veer allemaol ein !

Gegaeve in Vlorp oppe 23e jannewarie in 't jaor 2010 en geteikend:

Vors Roel

Besjtuur

Raod van Ellef

Adjudante Frank en Thei

Tanzmarieches Eva en Gwenny

Awt Prins Daan I